|
Акафист преподобному Корнилию Александровскому
Кондак 1
Избранный от Царя Сил и Духа Святаго исполненный, преподобне и Богоносне отче наш Корнилие, преизящное земли Александровския прозябение, пречудное обителей, тобою устроенных, украшение, величающе прославльшаго тя Славы Господа, воспеваем ти похвальная, добрый наш пастырю. Моли Христа Бога и Пресвятую Богородицу от всяких нас бед свободити, зовущих: Радуйся, преподобне Корнилие, монашескаго жития изрядный устроителю.
Икос 1
Ангелов Творец, предуведевый по самовластнаго чистаго сердца твоего изволению всеусердствующее Его воли исполнение избра тя изначала, да прославиши житием твоим пречудное имя Святыя Троицы. Темже яко луч пресветлый вечнаго Солнца Правды, просветися евангельское житие твое. Мы же, любовию понуждаеми, со благоговением и радостию глаголем ти сицевая: Радуйся, заповедей Христовых усердный исполнителю; радуйся, учений святаго наставника твоего Лукиана ревнителю. Радуйся, отче Богоносне, вся благая и красная мира сего презревый; радуйся, сердце свое во всегдашнее Богу и Божией Матери служение предавый. Радуйся, родителей благих плод добрый и избранный; радуйся, яко благодатию Божиею оправданный. Радуйся, правило веры и благочестия; радуйся, образе кротости и смирения. Радуйся, прелюбимое иноков похваление; радуйся, живущим в мире предивное поможение. Радуйся, проповедниче покаяния и ходатаю спасения; радуйся, обителей твоих священное украшение. Радуйся, преподобне Корнилие, монашескаго жития изрядный устроителю.
Кондак 2
Видящи Владычица Богородица велию любовь твою, преподобне отче Корнилие, к рождшемуся от Нея и распеншемуся за ны Христу Богу нашему, настави тя на тесный и скорбный путь иноческий, да сподобишися во славе небесней с ликом преподобных воспевати ангельскую песнь Пресвятей Троице: Аллилуиа.
Икос 2
Разум Божественных Писаний стяжав, от юности твоея в страсе Божии непрестанно помышляя о небесном, удалился еси мирскаго мятежа, Царствия Божия ради и правды Его. Мы же, дивящеся твоему благому намерению, воспеваем ти: Радуйся, подмосковныя Троицкия слободы чадо Богоизбранное; радуйся, родителей благочестивых — Игнатия и Евдокии — утешение Богодарованное. Радуйся, купеческаго наследия отца твоего отвержение благоразумное; радуйся, яко уподобился еси купцу, ищущему бисера умнаго. Радуйся, небеснаго отечества пламенне возжелевый; радуйся, благое иго Христово от детства на себе восприемый. Радуйся, от юности твоея всем сердцем и мыслию Бога возлюбивый; радуйся, любве ради Божия дом отеческий оставивый. Радуйся, на Бога Промыслителя всю надежду возложивый; радуйся, ангелом Его выну хранимый. Радуйся, преподобне Корнилие, монашескаго жития изрядный устроителю.
Кондак 3
Сила Божия укрепляше тя, славне Корнилие, егда мир отвергнув, иноческое житие восприял еси. Вселився в пустынь Флорищеву, скорое преуспеяние в подвизех благочестия показал еси, многия тамо своим любомудрым житием в посте и молитве, неустанном труде и бдении, и безответном, Господа ради, послушании удививый. Темже таковое твое о спасении души зряще тщание, умильно Всесильному Богу поем: Аллилуиа.
Икос 3
Имея крепкую веру во благое промышление Божие о спасении человека, неврежден явился еси от напасти и препятия, иже злобный враг тебе, Богомудре отче, содела: разжегл бо еси, окаянный, начальника обители тоя завистию к любве, еюже братия почиташа тя за смирение и богодухновенное учение. Ты же, аки адамант, сия злострадания терпеливо понесл еси, с миром изшед в пустынь Лукианову. Мы же, дивящеся таковому о тебе Божию промышлению, вопием ти хвалебно: Радуйся, непоколебимый столпе терпения; радуйся, пречудный образе кротости и смирения. Радуйся, незлобие Христово смирением стяжавый; радуйся, на обидящия тя евангельски взиравый. Радуйся, всем обидящим тебе вседушно прегрешения простивый; радуйся, многообразный козни лукаваго силою Божиею победивый. Радуйся, Божия произволения о спасении души твоея искавый; радуйся, в угождении Ему единому намерение полагавый. Радуйся, всякое испытание во спасение души своея понести готовый; радуйся, вступивый на путь тернистый и суровый. Радуйся, Богомудрый наставниче во всяких обстояниих; радуйся, пришедый в пустынь Лукианову, Богом наставляемый. Радуйся, преподобне Корнилие, монашескаго жития изрядный устроителю.
Кондак 4
Бурею богомерзких страстей и волнений непреодоленный, притекл еси, блаженне Корнилие, к преподобному Лукиану и обрел еси в нем добраго наставника монашескому деланию. Егоже отеческим наказанием в страсе Божий повинуяся, на кийждо день на большая простирался еси труды, и на кийждо день приятнейшим и любезнейшим Богу быти усердствовал еси; всякое же мира сладострастие и любочестие побеждая, единому Богу воспевал еси: Аллилуиа.
Икос 4
Слышаще и видяще братия пустыни Рождества Пресвятыя Богородицы, осиротевшия по преставлении первоначальника своего — преподобнаго Лукиана богоугодное житие твое, славне Корнилие, моляху тя, да восприимеши сан священнический и будеши им наставником, а обители строителем. Ты же, приявши крест пастырскаго служения, добре упасл еси словесныя овцы. Сего ради воспеваем ти таковая: Радуйся, заповедей и советов Божиих ревностный исполнителю; радуйся, к чистому и непорочному житию благопоспешный предводителю. Радуйся, Небеснаго Царя рабе благий и верный; радуйся, винограда Христова делателю усердный. Радуйся, не словом точию, но паче делом и слезною к Богу молитвою чада своя поучаяй; радуйся, твоих купножителей монашескими правилы боголепно наставляяй. Радуйся, яко собранную тобою братию духовною сладостию преизобильно насыщал еси; радуйся, яко огнь Божественныя любве в них прилежно возгревал еси. Радуйся, избранный Богом на освященное служение; радуйся, руководивый словесныя овцы на пажити спасения. Радуйся, прилежавый церковному строению и благоукрашению. Радуйся, во славу Святыя Троицы воздвигнувый храм Богоявления. Радуйся, преподобне Корнилие, монашескаго жития изрядный устроителю.
Кондак 5
Боготечней звезде подобен явился еси, преподобне, небо церковное украшаяй и люди веси Александровския лучами твоея святости, восприятия от истиннаго Солнца Правды, Христа Иисуса, озаряяй: иныя к иночеству наставляяй, инем в миру путь к Царствию Небесному указуяй. Темже смиренно молим тя: просвети и наша сердца, мглою страстей омраченная, да достойно воспеваем спасающему тобою Богу: Аллилуиа.
Икос 5
Видяще велие смиренномудрие твое, дивимся, святче Божий: преуспевая бо в подвизех, вящще жаждал еси духовнаго назидания. Сего ради обитель свою на время оставил еси, и со святыми отцы пребывати вожделел еси. Обаче, вновь в обитель возвратился еси на радость братии и людем. К тебе убо и мы прибегающе, сице глаголем: Радуйся, ища разума духовнаго к пустынным отцем притекший; радуйся, лжеименный разум века сего несумненно отвергший. Радуйся, многая в пустынных местех благая и душеполезная сокровища стяжавый; радуйся, аки богомудрая пчела от труждающихся тамо отец сладость иноческую собравый. Радуйся, туюжде сладость в землю Александровскую сохранно принесший; радуйся, зде обитель благоуспешно насадивший и сторицею возрастивший. Радуйся, равноангельскаго жития достигнути сподобивыйся; радуйся, в иноческих трудех и подвизех древним отцем уподобивыйся. Радуйся, алчущих жизни вечныя питателю; радуйся, жаждущих духовный напоителю. Радуйся, вертограда церковнаго крине благовонный; радуйся, проповеди евангельския глас богопросвещенный. Радуйся, преподобне Корнилие, монашескаго жития изрядный устроителю.
Кондак 6
Проповедник неленостный православныя веры и истиннаго жития во Христе Иисусе явился еси, преподобне, мирския и духовныя управляя. Прихождаше же в Александрову слободу потребы ради монастырския, многочастне в Успенском монастыре тоя слободы инокинь посещал еси, душевне и телесне их укрепляя, да поют благодарственно благих Подателю Богу: Аллилуиа.
Икос 6
Возсия земли Александровстей просвещение совершенных твоих добродетелей, изрядный угодниче Христов. Сего ради сестры обители Успенския, преклоньше колена, согласно моляху тя, дабы и им был еси пастырем. Ты же, зряху веру их, восприял еси их во свою паству духовную и был еси им учитель благочестивый и праведный. Сопричти и нас Богом собранному твоему стаду, со умилением зовущих: Радуйся, светильниче веры и добродетелей учителю; радуйся, паствы твоея изрядный душепопечителю. Радуйся, прибегающим к тебе отец чадолюбивый; радуйся, спастися хотящим усердно послуживый. Радуйся, в духовную паству твою таковых приимавый; радуйся, путь веры и благочестия тем указавый. Радуйся, жезле силы Божия, падающих укреплявший; радуйся Христу Богу многия души уневестивший. Радуйся, свеще неугасимая, мрак неведения прогоняющая; радуйся, учителя твоего, преподобнаго Лукиана, почитающим помогающий. Радуйся, водительства иноков и инокинь богоносный зиждителю; радуйся, обителей твоих непреоборимый поборниче и неусыпный хранителю. Радуйся, преподобне Корнилие, монашескаго жития изрядный устроителю.
Кондак 7
Хотя дати добрый ответ на Страшнем Судищи Христове о земнем житии твоем, начал еси зело скорбети, яко толикою тяготою обложися, два монастыря окормляя. Во обители бо своей живяше, новоприведенную паству из недели в неделю посещал еси, насыщая пищею духовною. Обаче Человеколюбец Господь незримо благою надеждою на неизследную бездну Своего милосердия тя укрепляше, из глубины души вопиющаго Ему: Аллилуиа.
Икос 7
Новыя труды и подвиги ко устроению обители Успенския подъял еси, отче преподобне. На обновление бо разоренных храмов и расширение монашеских келлий неленостно устремился еси, да инокинь на усерднейшее Христу Богу служение подвигнеши, повелевая на послушаниих в молитве и молчании пребывати, и благодарение единому Богу возсылати. Темже, хвалу поюще Подвигоположнику Христу Богу, взываем ти сице: Радуйся, обители твоя на утешение нам даровавый; радуйся, Богу единому работати всего себе подвигнувый. Радуйся, учениче пустынножителей и общаго жития устроителю; радуйся, трудолюбия, еже всякому благу начало и утверждение, теплейший рачителю. Радуйся, веру и любовь к Богу делы явивый; радуйся, многия истинно Христу служити научивый. Радуйся, иноческий путь неусыпною смиренною молитвою освятивый; радуйся, в тойже пребывати молитве твоих последователей добре наставивый. Радуйся, в молитвах своих душею в иной мир восходивый; радуйся, на поприще земнем новую и совершенную жизнь узревый. Радуйся, в иноческих трудех неутружденный подвижниче; радуйся, неутомимый хвалы и чести Божия в мире ревнителю и проповедниче. Радуйся, преподобне Корнилие, монашескаго жития изрядный устроителю.
Кондак 8
Странное и вельми скорбное житие проходя, блаженне отче, тяготы и немощи обольщенных диаволом чад твоих понесл еси, за стужающих ти Господеви моляся. Понеже братия Лукиановой пустыни начаша роптати и злословити тя при благодетелех и везде поносити, и нелепая глаголати. Егда же услыша сие игумения Анисия с сестрами, испросиша у Святителя Московскаго жити ти в обители Успения, а Лукианову пустынь кийжду неделю посещати. Мы же, дивящеся неисповедимым судьбам Божиим, воспеваем: Аллилуиа.
Икос 8
Все твое, богоносне отче, бяше тщание, да выну всезлобному врагу рода христианскаго сопротивлятися, общаго же всем Творца купно со ученики твоими в душе и теле прославляти. И в сем благоугоднем подвизе, укрепляемый силою свыше, толико преуспел еси, яко многия души из руки диаволи восхитил еси, сего ради окаянный зело разъ-яришася и начаша гневатися и всякия козни творити и человецы противу тя вооружати, укорами и поношением досаждаше. Обаче вся сия о Христе Иисусе преодолел еси, чесого и нас молитвами твоими сподоби, зовущих: Радуйся, противу вражиих наветов путь одоления нам показавый; радуйся, на мысленныя враги пост, молитвы и коленопреклонения вместо оружия употребивый. Радуйся, силою крестнаго знамения стрелы лукаваго отразивый; радуйся, крилома богомыслия сети вражия сокрушивый. Радуйся, надеждою на помощь свыше себе вооруживый; радуйся, незлобием Христовым духа злобы победивый. Радуйся, высокоумныя гордыни вражия крепкий смирителю; радуйся, пагубных наветов и стужений достохвальный упразднителю. Радуйся, плененных духами злобы свобождающий; радуйся, в невидимой брани от отчаяния избавляющий. Радуйся, от супостат боримым скоро пособствующий; радуйся, за одолеваемых от сопротивных присно ходатайствующий. Радуйся, преподобне Корнилие, монашескаго жития изрядный устроителю.
Кондак 9
Всякое естество ангельское удивися благодатному свыше тебе дарованию, яко на земли невещественное житие в творении заповедей Господних показал еси, и, взем на рамо свое крест Христов, плоть распял еси со страстьми и похотьми. Кто доволен изрещи болезни и борения твоя, преподобне отче, яже претерпел еси, Амалика мысленнаго побеждая. Темже, сам искушен быв, можеши и искушаемым помощи избран дом Духу Святому себе сотворити и в прекрасный вертоград вышний внити, идеже ты ныне благодарственно поеши Всесильному Богу: Аллилуиа.
Икос 9
Ветии многовещаннии не возмогут изрещи крепость любве твоея, блаженне, яже к Богу и людем: предал бо еси себе на служение братиям Христовым меньшим — странным и нищим трапезу учреждая, больных посещая, сирым и убогим отроковицем школу устрояя, всякую душу страждущую от Божественнаго Писания утешая. Сего ради уготованное верным рабом Божиим от сложения мира Царствие Небесное наследовал еси. Темже приими от нас сицевая: Радуйся, божественную любовь, яко соуз совершенства стяжавый; радуйся, вси концы земли нашея тою любовию объявый. Радуйся, ревностию в делех любве мир препобедивый; радуйся, горечь земныя юдоли многим усладивый. Радуйся, приходящих к тебе в болезнех и печалех терпению научивый; радуйся, благодатным словом ободрение и утешение им подававый. Радуйся, ненадежным надеяние и быстрое нищим услышание; радуйся, сирым, убогим и странным приятное попечение. Радуйся, за обидимых, озлобляемых и уничижаемых присно ходатайствующий; радуйся, благодетелей молитвенно почитати пример нам показующий. Радуйся, милости превеликия и скорбным сострадания сокровище; радуйся, всеусерднаго о людех промышления приятелище. Радуйся, преподобне Корнилие, монашескаго жития изрядный устроителю.
Кондак 10
Спасительнаго твоего подвига, преподобне Корнилие, достигл еси скончания и святую душу твою в руце Божии предал еси, юже Ангели святии вознесоша горе ко Престолу Вседержителя, всех грешных обращения и спасения милостивно ожидающаго. Сие помышляюще, молим тя: приведи нас, обуреваемых страстьми, к тихому пристанищу спасения, да в радости блаженней сподобимся вечно воспевати Премилосердому Богу: Аллилуиа.
Икос 10
Стена всем святым и иноком Отрада, Пресвятая Дева сподоби тя попечение творити с двух обителех, в честь и славу Ея устроенных: наченши бо поприще пастырское в пустыни Рождества Пресвятыя Богородицы, добре скончал еси сие во обители пречестнаго Ея Успения. Мы же, дивящеся таковому произволению Богоматере, вопием ти: Радуйся, служение Божией Матери по Бозе паче всего вседушно возлюбивый; радуйся, неотступно на милость Ея упования возложивый. Радуйся, смиренно моливый Владычицу путь твой управити; радуйся всепетое имя Ея благодарне прославивый. Радуйся, Божия Матере чадо верное и возлюбленное; радуйся, силы Ея священнаго Покрова постижение тайное и чудное. Радуйся, благословения преподобнаго Лукиана чрез образ Ея Рождества добронравный хранителю; радуйся, Заступницы усердныя благоговейный почитателю. Радуйся, многочастне в нощи молитвы к Ней слезно возносивый; радуйся, небесныя помощи от Нея непостыдно восприемый. Радуйся, Пресвятыя Богородицы милостями нас ущедряющий; радуйся, невидимых даров благодати от Нея сподобляющий. Радуйся, преподобне Корнилие, монашескаго жития изрядный устроителю.
Кондак 11
Пение всеумиленное Пресвятей Троице возносил еси, преподобне, всем житием твоим заблуждших к покаянию призывая и плоды достойны покаяния творити научая. Сподоби и нас, почитающих любовию святую память твою, в чистоте и правде дни земнаго жития скончати, да поем вкупе: Аллилуиа.
Икос 11
Светоподательный светильник быв в житии, богоблаженне отче, заповедям Евангелия, в Царствие Небесное ведущим, усердно поучал еси монахов и всех людей, притекавших к тебе. По смерти же твоей явился еси яко светозарное светило Александровския земли. Божественными лучами Трисолнечнаго Света осияваем, облиставаеши верныя, вопиющия к тебе таковая: Радуйся, Трисолнечнаго Святыя Троицы Света выну просвещающее озарение; радуйся, доброзрачнаго света евангельскаго всесветлое сияние. Радуйся, в омрачении страстей пребывающих кроткий обличителю; радуйся, в суете и самозабвении жительствующих предивный вразумителю. Радуйся, нерадения и праздности известный прогонителю; радуйся, кающимся оставление прегрешений от Христа Бога подателю. Радуйся, чистому и непорочному житию благопоспешный предводителю; радуйся, бодрости и трезвения предобрый учителю. Радуйся, множества иноков духовное просвещение; радуйся, изящный и верный путеводителю ко спасению. Радуйся, всех подвизающихся во благочестии под твой кров и заступление отечески приемлющий; радуйся, заповедей Божиих исполнителю усерднейший. Радуйся, преподобне Корнилие, монашескаго жития изрядный устроителю.
Кондак 12
Благодатию священства облеченный и сладость церковную познавый, велию ревность имел еси ко святей Церкви Божией, усердно совершая служение Богу, украшая ю благоговейным чтением и пением. Паче бо всех красот мира возлюбил еси, святче Божий, благолепие дому Господня, имея благое рассуждение, яко сего на сем свете несть честнейши. К сему боголюбезному устроению и нас подвигни, зовущих: Аллилуиа.
Икос 12
Поюще твое прославление в лике святых, ублажаем тя, преподобне Корнилие, купно с преподобным Лукианом, яко многомощныя молитвенники о нас пред Господем, утешители и заступники явилися есте. Новое бо и велие чудо нам, недостойным, показавше, обители, вами устроенныя, возродили есте, врата их вновь черноризцам, ищущим Лице Бога Живаго, отверзающе. Сего ради с любовию возглашаем ти сице: Радуйся, Православныя Церкве Российския похвало и украшение; радуйся, всея Александровския земли увеселение. Радуйся, предстателю о нас пред Господем непостыдный; радуйся, к Богородице молитвенниче наш неусыпный. Радуйся, душу свою силою Божиею преобразивый; радуйся, праведною кончиною святость жития своего показавый. Радуйся, возшедый на гору превысокую добродетелей божественных; радуйся, яко от тоя удобь возшел еси на гору небесную. Радуйся, сонма преподобных отец причастниче; радуйся, преблагий и добрый иноков наставниче. Радуйся, осиянный Духа Святаго благодатию; радуйся, любящим и чтущим тя спасения ходатаю. Радуйся, преподобне Корнилие, монашескаго жития изрядный устроителю.
Кондак 13
О, предивный угодниче Христов, преподобне отче наш Корнилие! Приими сие малое моление наше, в похвалу тебе возносимое; настави нас на путь покаяния и спасения, испроси у Господа Сил муки вечныя избавления. Да с тобою вкупе в Царствии Небеснем воспеваем немолчно Триипостасному Богу: Аллилуиа.
(Этот кондак читается трижды, затем икос 1 и кондак 1)
Молитва преподобному Корнилию Александровскому
О, священная главо, преподобне и богоносне отче наш Корнилие! Ты, всеусердно поработати Господеви и Пречистей Его Матери желая, в земли Александровстей вселился еси и зде, глаголами богомудраго Лукиана наставляем, стопам его последовал еси, обители, им основанныя, добре устрояя. Неленостно в трудех, бдениих, молитвах и постех подвизаяся, бесовския козни мужески поправше, был еси наставник монахам, всем же людем учитель ревностный и отец чадолюбивый. Ныне убо, по отшествии твоем от земных Небесному Царю предстоя, моли благость Его, еже ущедрити место селения твоего и святыя обители твоя, идеже духом любве твоея неотступно пребываеши; и всем людем, с верою к мощем твоим приходящим, во благая прошения их исполнити. Испроси у Великодаровитого Бога нашего, да сохранит Святую Церковь непозыблему от ересей и расколов. Отечеству нашему мир и тишину да дарует, нам же да продлит время на покаяние и исправление жития. Утверди нас в соблюдении Христовых заповедей, да тако зде богоугодно поживши, сподобимся безпреткновенно внити в вечное Небесное Царство, идеже ты со учителем твоим преподобным Лукианом и всеми святыми непрестанно прославляеши Отца и Сына и Святаго Духа во веки веков. Аминь.
Тропарь преподобному Корнилию Александровскому
Тропарь, глас 2
Имже образом желает елень на источники водныя, сице возжела душа твоя от юности к Богу. Трудом и молитвою житию святых отец поревновав, Божиим изволением и молитвами Пресвятыя Богородицы земли Александровския светильник показался еси и малое стадо Христовых овец добре упасл еси. Сопричти и нас Богом собранному твоему стаду, почитающих любовию святую память твою, Корнилие преподобне отче наш.
Кондак, глас 4
Заповеди Христовы усердно исполнив, пастырства благодать наследовал еси, болезнуя сердцем о всех, с верою притекающих к тебе, иноков собиратель, Корнилие преподобне. Темже и мы, чада твоя, с любовию вопием ти: со учителем твоим преподобным Лукианом моли Христа Бога спастися душам нашим.
|
