|
Акафист святым мученикам Виленским: Антонию, Иоанну, Евстафию
Кондак 1
Избраннии Богом для свидетельства православныя веры, мужески попрасте, святии мученицы, языческое нечестие, и за ваша страдания нетленными венцы от Христа Бога увенчастеся; темже мы, ублажающе вашу память, всеумиленно взываем к вам: Радуйтеся, святии мученицы, Антоние, Иоанне и Евстафие.
Икос 1
Ангели земнии и человецы небеснии явистеся, святии мученицы, егда озарившеся светом истиннаго богопознания, радостно потекосте на страдальческий подвиг. Приимите убо от нас хвалебное пение сие: Радуйтеся, богоблаженнии исповедницы православныя веры, издревле насажденныя в земли Российско-Литовской; Радуйтеся, неумолкающии глашатаи истиннаго благочестия. Радуйтеся, велии подвижницы, ни во чтоже вменившии славу мира сего, да Христа приобрящете; Радуйтеся, возлюбившии Христа Бога всем вашим сердцем и всею душею. Радуйтеся, кровию вашею запечатлевшии любовь вашу к Господу Иисусу; Радуйтеся, святии мученицы, Антоние, Иоанне и Евстафие.
Кондак 2
Видяще, яко нетленныя мощи ваша даруют всем, притекающим с верою, исцеление от болезней душевных и телесных, благодарим милосердаго Бога, прославившаго вас, святии мученицы, такою благодатию, и вопием Христу Спасителю: Аллилуиа.
Икос 2
Разумныя очеса ваша вперивше в познание истинныя веры, вы, святии братия Антоние и Иоанне, мужемудренно отвергостеся языческаго прельщения, и за исповедание единаго истиннаго Бога радостно приясте узы, темничное заключение, раны и лютую смерть. Таковому подвигу вашему поревновав, и юный Евстафий, небоязненно исповедал себе христианина быти, и сподобился таких же лютых за Христа мучений и смерти. За таковое ваше, еже за Христа, святое дерзновение взываем к вам сице: Радуйтеся, блаженная троице честных страстотерпцев, прославивших истиннаго Бога, во Святей Троице покланяемаго, Отца, Сына и Святаго Духа; Радуйтеся, доблии воины Христовы, сохранившии верность ко Владыце до смерти. Радуйтеся, не убоявшиися претерпети за Христа никиих мук; Радуйтеся, яко ни теснота, ни узы, ни страдания, ни самая смерть не могли разлучити вас от любве Христовой. Радуйтеся, изгнаннии, поруганнии и убиеннии правды ради, яко мзда ваша многа на небеси; Радуйтеся, святии мученицы, Антоние, Иоанне и Евстафие.
Кондак 3
Силою Вышняго укрепляеми, небрегосте, святии мученицы, тяжкаго страдания ваших телес, преданных мукам, и на мучения, аки на брачный пир, радостно текосте; мы же благодарственно взываем укрепившему вас Христу Богу: Аллилуиа.
Икос 3
Имуще крепкую надежду на Небеснаго Царя и Бога и помняще апостольское слово, яко подобает повиноватися Богу паче, нежели человеком, вы, святии мученицы, не повинустеся велению вашего мучителя, еже возвратитися к прежнему языческому нечестию: Радуйтеся, убо исповедавший Христа пред человеки и от Него исповеданнии пред Отцем Небесным; Радуйтеся, вернии слузи Христовы, за верность свою наследовавшии Царствие Небесное. Радуйтеся, сожителие ангелом и приснии всем святым; Радуйтеся, водвореннии в невечернем дни Царствия Божия. Радуйтеся, призирающии с небеси на земную братию вашу и молящиися о всех, призывающих вас на помощь; Радуйтеся, святии мученицы, Антоние, Иоанне и Евстафие.
Кондак 4
Буря ярости ваших мучителей не поколебала крепкой вашей веры, надежды и любве к Спасителю Богу, и вы, святии мученицы, ревностно упреждасте друг друга в тяжких страданиях, воспевая Богу в сердцах ваших: Аллилуиа.
Икос 4
Слышана бысть по всей православной земли радостная весть, яко вы, святии мученицы, подвигом добрым подвизастеся, течение ваше добре скончасте и веру до конца соблюдосте. Сего ради мы со всею Православною Церковию ублажаем вас: Радуйтеся, исполнившии слово Христово, еже претерпевый до конца, той спасен будет; Радуйтеся, вашим терпением удивившии мучителей ваших. Радуйтеся, примером вашей жизни и смерти обратившии многих ко Господу; Радуйтеся, яко и ныне чудесами, истекающими от святых ваших мощей, вы укрепляете православную веру в людех. Радуйтеся, яко за терпение ваше соблюдеся вам венец правды на небеси; Радуйтеся, святии мученицы, Антоние, Иоанне и Евстафие.
Кондак 5
Боготечными звездами православныя веры бысте вы, святии мученицы, для ваших земных соотчичей, указуя для них в Православной Церкви единый надежный путь ко спасению, да вси единым сердцем и едиными усты взывают спасающему Богу: Аллилуиа.
Икос 5
Видено бысть чудное знамение Божией благости, егда честное место ваших страданий озарил свыше облачный столп, указующий вам путь к небеси, яко же древле израильтяном из Египта в землю обетованную. Сего ради воспеваем к вам: Радуйтеся, чада новаго Израиля, достигшии горняго Небеснаго Иерусалима; Радуйтеся, добре прошедшии многотрудное странствие ваше в пустыни сея жизни и вселившиися в стране обетованной вечной. Радуйтеся, яко не Моисей, но Сам Христос Бог бысть для вас вождем к Небесному Отечествию; Радуйтеся, победившии всех ваших супостатов и противников на пути к Царствию Небесному. Радуйтеся, блаженнии небожители, вкушающии вечная блага, ихже око не виде, и ухо не слыша, и яже на ум человеку не взыдоша. Радуйтеся, святии мученицы, Антоние, Иоанне и Евстафие.
Кондак 6
Проповедуют святыя мощи ваша паче всякаго красноречия несомненную надежду всеобщаго воскресения, егда Бог, не дающий и ныне преподобным Своим видети истление, воззовет к пакибытию весь род человеческий, и вси сподобльшиися стати одесную Престола Господня воспоют Ему: Аллилуиа.
Икос 6
Возсия новый свет для всея Российския земли, егда милосердый Бог явил величие Своих чудес над вашими нетленными мощами, яже страха ради иноверческаго вторицею сокрыты быша в недрах земли под спудом храма, и оттоле источаху обильныя исцеления всем, с теплою молитвою прибегавшим к вашей честной иконе. Приимите же от нас, святии мученицы, сие усердное славословие: Радуйтеся, светозарныя светила Христовой Церкви, не могущия сокрытися под спудом; Радуйтеся, скории врачи душ и телес наших. Радуйтеся, защитники наши от зловредных иноверческих мудрований; Радуйтеся, светлии вожди наши к истинному богопознанию и богопочтению. Радуйтеся, усердные молитвенницы наши пред Господом; Радуйтеся, святии мученицы, Антоние, Иоанне и Евстафие.
Кондак 7
Хотяще прославити Господа Бога, дивнаго во святых Своих, не обретаем довольных слов еже благохвалити Его по достоянию; но вас, святии мученицы, призываем на помощь, молитеся за ны прилежно, да неосужденно дерзаем воспевати Господу: Аллилуиа.
Икос 7
Новоявленными мучениками нарекла вас Православная Церковь, яко матерь, веселящаяся о чадех своих; и якоже древнии мученицы по всей вселенней своими страданиями утвердиша Божественную веру, подобие им и вы, новоявленнии мученицы, тако утвердисте святую веру в месте земнаго отечествия вашего, яко никия козни иноверия не могут поколебати ея, и мы, благодаряще, взываем к вам: Радуйтеся, твердии столпы православия, ими же красуется и укрепляется Святая Церковь; Радуйтеся, искуснии кормчии, благонадежно ведущии нас среди временных волнений к пристанищу вечныя жизни. Радуйтеся, споспешницы нашего оправдания; Радуйтеся, яко молитвами вашими мы избавляемся от всякаго лукаваго прельщения, ищущаго уловити души наша. Радуйтеся, благодетели наши, указующии нам, путь ко спасению. Радуйтеся, святии мученицы, Антоние, Иоанне и Евстафие.
Кондак 8
Странное и для ума человеческаго непостижное, обаче явнозримое нами чудо всемогущества Божия является в нетлении святых ваших мощей, яже больше полутысящи лет пребывают невредимы от разрушительных стихий и от времене всепоядающаго, воздвизая нас со умилением пети Господу: Аллилуиа.
Икос 8
Вся радости века сего, всю честь вашего звания и всю крепость ваших сил принесосте, святии мученицы, в жертву Спасителю Богу, и сподобистеся от Него мздовоздаяния на небеси, идеже ни червь, ни тля тлит, ни татие не подкапывают и не могут похитити дарованнаго вам наследия: Радуйтеся, убо, мудрии искатели Царствия Божия, подобнии евангельскому мужу, иже обрет на селе сокровище сокровенно, вся продает, елика имать, и купует то село драгоценное; Радуйтеся, обретшии един многоценен бисер, иже есть Царствие Божие, и за него отдавшии вся блага мира сего. Радуйтеся, паче мудрых века сего уразумевшии цену бытия земнаго; Радуйтеся, святии проповедницы, возвещающии нам из вашего гроба, яко недостойны суть страсти нынешняго времени к хотящей явитися славе грядущаго Царствия. Радуйтеся, граждане небеснии и сонаследницы всем святым; Радуйтеся, святии мученицы, Антоние, Иоанне и Евстафие.
Кондак 9
Всякия скорби, болезни и прилоги наша вы утоляете, святии мученицы, и темныя зраки лукавых бесов далече от нас отгоняете, да тако вашею помощию, благодатию же Божиею спасаеми, благодарным и радостным гласом воспеваем Богу: Аллилуиа.
Икос 9
Витийство человеческое немотствует, тщащееся восхвалити вас, святии мученицы, за ваша страдания, яже претерпесте Христа ради, и за вашу мученическую смерть. Обаче любовию вашею побеждаеми, елико можем, ублажаем вас: Радуйтеся, возвеселившии весь ангельский лик вашим за Христа терпением и страданием; Радуйтеся, дружелюбно принятыи на небеси от всего сонма праведников и угодников Божиих. Радуйтеся, яко представше Престолу Господню, сподобилися есте поклонитися Ему и получити от Него вечную награду; Радуйтеся, обитающии во светлостех святых, идеже несть болезнь, ни печаль, ни воздыхание. Радуйтеся, утешители всех гонимых и терпящих за Христову веру; Радуйтеся, святии мученицы, Антоние, Иоанне и Евстафие.
Кондак 10
Спасения и вечнаго покоя достигше после многоскорбныя земныя жизни, вы и нас, святии мученицы, поучаете, яко един есть истинный путь ко спасению в сем мире злом и лукавом, еже вся благодушно терпети Христа ради, воспевающе Ему усердно: Аллилуиа.
Икос 10
Стены пещернаго храма, идеже нетленно почивают ваша цельбоносная телеса, просвещаются, аки небесный чертог, и вси жаждущии спасения прибегают к вам, святии мученицы, с мольбами, с благодарением и с славословием: Радуйтеся, помощницы наши в скорбех, болезнех и печалех; Радуйтеся, ходатаи наши пред Престолом Небеснаго Судии живых и мертвых. Радуйтеся, яко никто же прибегаяй к вам помощи ради отходит от вас тощ; Радуйтеся, щедрии подателие нам Божией милости. Радуйтеся, обрадованнии на небеси и нас на земли укрепляющии в радостной надежде вечнаго спасения; Радуйтеся, святии мученицы, Антоние, Иоанне и Евстафие.
Кондак 11
Пению ангельскаго лика на небеси совокупльше ваши преподобныя гласы, вы, святии мученицы, купно с небесными чины непрестанно славите Господа Бога; и мы, недостойнии, уповающе на милосердие Божие, дерзаем на земли бренными устами и благодарным сердцем воспевати Ему: Аллилуиа.
Икос 11
Светозарнаго дне всеобщаго воскресения и страшнаго суда Божия чающе, ужасаемся лютых наших деяний и безмерных грехов, ими же ежечасно прогневляем Создателя и Спасителя нашего; но имея вас, святии мученицы, предстательствующих за ны пред Господом, благодарственно взываем к вам: Радуйтеся, яко мы по Бозе и по Пречистой Приснодеве Богородице все наше упование на нас возлагаем; Радуйтеся, яко вы не посрамите нас от чаяния нашего. Радуйтеся, яко молитвами вашими мы уповаем получити отпущение грехов и жизнь вечную; Радуйтеся, благословеннии Отца Небеснаго, наследовавшии уготованное вам Царствие от сложения мира. Радуйтеся, яко и мы вашим заступлением чаем избежати участи стоящих ошуюю Престола Судии; Радуйтеся, святии мученицы, Антоние, Иоанне и Евстафие.
Кондак 12
Благодать чудесных исцелений и скораго продстательства за нас пред Господом имуще, не преставайте, святии мученицы, выну помогати нам, славящим о вас Христа Бога и вопиющим Ему: Аллилуиа.
Икос 12
Поюще ваше светлое прославление на небеси и на земли, благодарим Всемилостиваго Спаса и Бога нашего, яко содержай в Своей руце времена и лета, благоволил прославити и явити нам вас, святии мученицы, в благопотребное для нашего спасения время, да не погрязнем в тимении пагубных страстей и неразумных стремлений; сего ради возсылаем к вам наше усердное благохваление: Радуйтеся, неусыпнии стражи нашего спасения, берегущии нас от всякаго навета неприязненнаго; Радуйтеся. хранителие наши, удаляющии от нас всякое вредное искушение. Радуйтеся, искуснии наставницы наши в непоколебимом и твердом исповедании православныя веры; Радуйтеся, громогласнии органы благодати Божией, наполняющей Православную Церковь. Радуйтеся, великии соотчичи наши, всем нам желающии и помогающии спастися; Радуйтеся, святии мученицы, Антоние, Иоанне и Евстафие.
Кондак 13
О преславнии и святии мученицы: Антоние, Иоанне и Евстафие! Приимите сие малое, но усердное моление наше, и ходатайством нашим у Христа Бога избавьте нас от всех болезней душевных и телесных, и от всякаго прилога вражия, и от всякия беды и напасти, да выну, благодаряще о вас Господа Бога, радостно воспеваем Ему: Аллилуиа.
(Этот кондак читается трижды, затем икос 1 и кондак 1)
Молитва святым мученикам Антонию, Иоанну и Евстафию Виленским
Святии мученицы Антоние, Иоанне и Евстафие! Призрите с небеснаго чертога на требующих вашей помощи и не отвергните прошений наших; но яко приснии благодетели и ходатаи наши, молите Христа Бога, да человеколюбив и многомилостив сый, сохранит нас от всякаго лютаго обстояния: от труса, потопа, огня, меча, нашествия иноплеменников и междоусобныя брани. Да не осудит нас грешных по беззакониям нашим, и да не во зло обратим благая, даруемая нам от всещедраго Бога, но во славу святаго Имени Его и в прославление крепкаго вашего заступления. Да молитвами вашими даст нам Господь мир помыслов, воздержание от пагубных страстей и от всякия скверны; и да укрепит во всем мире Свою едину Святую, Соборную и Апостольскую Церковь, юже стяжал есть честною Своею кровию. Молитеся прилежно, святии мученицы, да утвердит Христос Бог во Святей Своей Православной Церкви живый дух правыя веры и благочестия; да вси члены ея, чистии от суемудрия и суеверия, духом и истиною покланяются Ему и усердно пекутся о соблюдении Его заповедей; да мы вси в мире и благочестии поживем в настоящем веце и достигнем блаженныя вечныя жизни на небеси, благодатию Господа нашего Иисуса Христа, Ему же подобает всякая слава, честь и держава со Отцем и Святым Духом, ныне и присно и во веки веков. Аминь.
Тропарь мученикам Антонию, Евстафию и Иоанну Виленским (Литовским)
Тропарь 1, глас 4
Иже земных чести и славы отвергшеся, доблии и честнии, страдальцы, веры ради крепко и мужественно муки претерпесте, на смерть себе давше за живот всех Владыку: тем же и Христос преславно столпом облачным с небесе вас озари и почестьми и венцы от престола славы венча: со Ангелы Тому предстояще, молите спастися душам нашим.
Тропарь 2, глас 4
От корене неплодна, преблаженнии, возрастивше православныя веры ветви, первомучеником тезоименитии явистеся: злаго бо и нечестиваго князя ярости не убоястеся, повелевающа Христа отрещися, сего ради мученическия венцы приемше и со Ангелы престолу Владычню предстояще, о нас молитеся, преблаженнии, православно чтущих святую память вашу.
Величание
Величаем вас, страстотерпцы святии Антоние, Иоанне и Евстафие, и чтем честная страдания ваша, яже за Христа претерпели есте.
|
