|
Акафист Пресвятой Богородице в честь иконы Ея Ченстоховския (или Непобедимая Победа)
Кондак 1
Взбранной Воеводе, Спасительнице земли Русския, похвальное приносим пение. Ты же, Мати царя Небесного от всякия избави напасти страну нашу и от всех скорбей и бед свободи зовущих: Радуйся, Заступнице Усердная, избави нас от всякого зла и сотвори чудо спасения.
Икос 1
Ангельский собор на Небеси немолчно воспевает Тя, Владычице, и мы земнороднии, притекающе ко иконе Твоей чудотворней, святым Лукою писанной, вопием Ти сице: Радуйся, Мати Света Невечерняго; Радуйся, Духа Святага Обитель Священная; Радуйся, светлое благодати Познание; Радуйся, Ангельских Сил Ликование; Радуйся, Купино неопально горящая; Радуйся, Господа Сил вечно Зрящая; Радуйся, Неувядаемый Цвете нетления; Радуйся, Образе Христова Воскресения; Радуйся, Заступнице Усердная, избави нас от всякого зла и сотвори чудо спасения.
Кондак 2
Видяще благочестие и веру святыя царицы Елены, обретшей Крест Честный Господень во Иерусалиме, даровала еси ей, о Богомати, и икону Свою, чрез верных служителей Своих сохраненную от лет древних, да молятся пред нею выну людие, поюще: Аллилуиа.
Икос 2
Разумевше святая царице Елено, яко образ сей есть благословение Божие граду царствующему, поставиша е тамо в церкви соборней, идеже мнози от него исцеления прияша, поюще Матери Божией похвалы сицевыя: Радуйся, Чаше, черплющая вечную радость; Радуйся, Источниче, изливающий неизреченную сладость; Радуйся, Чертоже Рая краснейший; Радуйся, Вертограде Христов славнейший; Радуйся, Духа Святаго Селение; Радуйся, врагов Божией Правды Посрамление; Радуйся, духовною радостию нас Утешающая; Радуйся, с верою Тя призывающих, не посрамляющая; Радуйся, Заступнице Усердная, избави нас от всякого зла и сотвори чудо спасения.
Кондак 3
Сила Вышняго храняше икону Твою, Богомати, во дни ересей от поругания, и от лютых иконоборцев погубления, и от рук варварских пленения, яко Самей Ти быти Хранительницей христианом, поющим Сыну Твоему и Богу: Аллилуиа.
Икос 3
Имуще сокровище святыя иконы Твоея, святии Кирилле и Мефодие просветиша земли славянсткии светом веры христианский, да уведят язычницы Бога истиннаго и прославят Матерь Божию тако: Радуйся, Державная наша строительнице; Радуйся, Всесильная Победительнице; Радуйся, Свободительнице пленных; Радуйся, Покровительнице обремененных; Радуйся, Ходатаица за всю Вселеную; Радуйся, Дарующая жизнь нетленную; Радуйся, идольского служения Избавление; Радуйся, с Богом наше примирение; Радуйся, Заступнице Усердная, избави нас от всякого зла и сотвори чудо спасения.
Кондак 4
В бурныя дни смут и нестроений, спасаше икона Твоя, Пресвятая Дево, всех притекающих к ней и обретаху вси от Тебе покров и заступление вопиюще благодарными сердцы: Аллилуиа.
Икос 4
Слышаще и зряще чудеса, являемыя от иконы Твоея, Пресвятая Богородице, князне русстии храниша от рода в род святыню сию, молящеся пред нею умиленно: Радуйся, Агнца и Пастыря Мати Нетленная; Радуйся, Дево преблагословенная; Радуйся, Матер-нюю любовь нам являющая; Радуйся, ризою честною всех покрывающая; Радуйся, благ вечных Надеждо верная; Радуйся, Молитвеннице наша усердная; Радуйся, Судии Всеправедного Умоление; Радуйся, грехов всех наших Прощение; Радуйся, Заступнице Усердная, избави нас от всякого зла и сотвори чудо спасения.
Кондак 5
Боготечне шествуя изо града во град Руси Червонныя икона Твоя Пресвятая Богородице, повсюду являше славу твою и Сына Твоего, Христа Бога нашего, вопиющим Ему людем: Аллилуиа.
Икос 5
Видеша житилие града Белза грозное нападение агарян, изнесоша икону Твою чудотворную, Пресвятая Дево, на стогны града своего и молящеся с верою Ти о заступлении, Ты же ускорила еси тогда на помощь им, да зовут Ти: Радуйся, милости Свои на нас изливающая; Радуйся, Владыку Умилостивляющая; Радуйся, иконою Твоею от бед Сохранение; Радуйся, христиан православных Спасение; Радуйся, злые дела Запинающая; Радуйся, милосердие нам Являющая; Радуйся, страны Российския Утешение; Радуйся, Церкви Христовой священное Украшение; Радуйся, Заступнице Усердная, избави нас от всякого зла и сотвори чудо спасения.
Кондак 6
Проповедаху всюду людие о дивнем заступлении Твоем, яко егда нечестивии татарове стрелою уязвиша на иконе изображение Пречистаго Лика Твоего, тогда внезапу тьма и помрачение найде нань и друг друга убиваху тыя, бежаще вспять, вернии же зряще чудо сие, пояху Господу хваление: Аллилуиа.
Икос 6
Возсия благодать и мрак исчезе и возвысися рог людей христианстких, яко Ты, Богомати, укреплявши веру православную, чудесьми и знаменьми от святыя иконы Твоея являемыми человецем, молящимся тако: Радуйся, от нашествия иноплеменников предивно избавляющая; Радуйся, от плена и поражения спасающая; Радуйся, агарянскою стрелою пронзенная; Радуйся, Мати и Дево Неизреченная; Радуйся, молящимся токи чудес источающая; Радуйся, печаль на радость прелагающая; Радуйся, ключу Царствия Небеснаго; Радуйся, Помощнице жития честнаго; Радуйся, Заступнице Усердная, избави нас от всякого зла и сотвори чудо спасения.
Кондак 7
Хотяще оставити икону Свою во граде Ченстохове, сделала еси возок с иконою недвижимым, егда нецыя злочестивия тщахуся исхитити ю из града, христиане же обретше и образ Твой неукраденным, возопияше Богу: Аллилуиа.
Икос 7
Новое чудо, на устрашение нечестивих явила еси тогда от образа Твоего Пречистая, поразивши слепотою и скорою смертию богохульников, иже икону Твою мечем уязвиша и на три части разсекоша, мы же икону сию чтуще вопием Ти: Радуйся, Матерь Божия закланная; Радуйся, от начала веков Предъизбранная; Радуйся, Путеводительнице к Небу первейшая; Радуйся, всех Ангельских Сил честнейшая; Радуйся, милосердая всех Мати; Радуйся, неисчерпаемый Сосуд благодати; Радуйся, просящим помощь являющая; Радуйся, доброе житие устрояющая; Радуйся, Заступнице Усердная, избави нас от всякого зла и сотвори чудо спасения.
Кондак 8
Странно бысть войску свейскому видети, яко непобедимое доселе грозное воинство их побеждено бысть внезапу близ града Ченстохова, идеже чудотворная икона Богоматери стояше, пред нею же людие не преставаху пети: Аллилуиа.
Икос 8
Всем молящимся и притекающим ко иконе Твоей Скорая Помощнице являешися, Пресвятая Дево, якоже древле, тако и ныне заступавши и охранявши почитающих Тя, приими и сия похвалы от нас: Радуйся, Совета неизреченнаго Таиннице; Радуйся, благодати Божией Сокровищнице; Радуйся, иноплеменных ратей Одоление; Радуйся, от убиения и разорения Спасение; Радуйся, горняго и дольняго мира Всецарице; Радуйся, всяческих благ подательнице; Радуйся, от врагов и бед избавление; Радуйся, непрестанное человек удивление; Радуйся, Заступнице Усердная, избави нас от всякого зла и сотвори чудо спасения.
Кондак 9
Всякий пол и возраст возвеселися зряще, егда царь русский Петр молебное пение пояше перед иконою Богоматери, памятующе, яко образ сей бысть некогда достояние царское и князей русских, восхваляше пред ними Господа и Матерь Его песнию: Аллилуиа.
Икос 9
Весь мир христианский покрывавши омофором милости Своея, на помощь скоро к нам притекавши, купно со угодники Божии и святителем Николаем за нас перед Богом ходатайствуеши, вонми и ныне гласу молений наших перед образом Твоим: Радуйся, светом истины нас Озаряющая; Радуйся, руце Твои за ны моляшася Простирающая; Радуйся, Бога и человека Соединившая; Радуйся, смертное естество бессмертием Просветившая; Радуйся, верных душ Услаждение; Радуйся, душепагубных дел Удаление; Радуйся, благочестивых христиан Окормительнице; Радуйся, смиренномудрых благая Вседержительнице; Радуйся, Заступнице Усердная, избави нас от всякого зла и сотвори чудо спасения.
Кондак 10
Спасти хотя род человечь, Богомати, от тьмы неверия и заблуждения, яви миру свет веры Православныя и токмо воинству русскому подаде одолети крепость, идеже икона Ея чудотворная стояше, пред нею же воспе благодарственно: Аллилуиа.
Икос 10
Стена нератуема и ограждение твердое, Ты еси верным людем русским почитающим Тя, о Божия Мати, яко во мнозех списках со иконы Ченстоховския являвши благоволение Свое, просимое подаеши и гнев Божий отвращавши от поющих Ти: Радуйся, Державу Российскую Устрояющая; Радуйся, под нозе Царя Православного вся Покаряющая; Радуйся, Обличающая учения душевредныя; Радуйся, Призревающая на молитвы смиренныя; Радуйся, в печалех и бедах Утешение; Радуйся, от нечаянные смерти Спасение; Радуйся, Дарующая Победы верным; Радуйся, Венчающая венцем нетленным; Радуйся, Заступнице Усердная, избави нас от всякого зла и сотвори чудо спасения.
Кондак 11
Пение воспеваем и хвалу приносим Ти, о Пресвятая Дево, молимся пред иконою Твоею, на ней же зрим язвы, руками нечестивых человек нанесенныя, от наших же прегрешений незаживляемыя, к Богу взываем, имуще Тя о нас Ходатаицу: Аллилуиа.
Икос 11
Светоявленная икона Твоя сияет чудесы, даже и доднесь, являя нам милость Твою, яко многажды тщахуся людие сокрыти вапы различными уязвление Пречистаго Лика Твоего, на сей иконе живописанного, но всуе трудишася изографы, яко паки проступаху язи, ихже мы грехми нашими и беззаконьми наносим Ти, но отпусти нам вся, Дево, и помилуй зовущия: Радуйся, крепкое Веры Забрало; Радуйся, чудес Христовых Начало; Радуйся, Врат Райских Отверзение; Радуйся, тайны Божией всесильное Проявление: Радуйся, приятное молитвы Кадило; Радуйся, носящего вся Носило; Радуйся, людскими грехми Истерзанная; Радуйся, в любви Божией Утвержденная; Радуйся, Заступнице Усердная, избави нас от всякого зла и сотвори чудо спасения.
Кондак 12
Благодатию покрый нас, о Пресвятая Дево, исходящею от дивныя иконы Твоея, предстательством Твоим спаси и помилуй страну Русскую, в ней же во дни древния чудесы многими просияла еси и яви нам, молящимся пред образом Твоим, чудо спасения, поющим Сыну Твоему и Богу: Аллилуиа.
Икос 12
Поюще пение похвальное усты недостойными, уповаем на милость Божию и Твое, о Богомати, заступление и ходатайство за нас, грешных, пред Господем, яко да дарует державе русстей на супостаты одоление, от иноплеменных поган свобождение, царя православного во охранение и к Царствию Небесному путевождение, и выну буди с нами, зовущим Ти: Радуйся, огнем Божественным Всепросвещающая; Радуйся, мрак греха Отгоняющая; Радуйся, жестокости наших сердец Умягчение; Радуйся, заблудших на путь спасения Возвращение; Радуйся, Стено Нерушимая; Радуйся, Победо Непобедимая; Радуйся, Небеси и земли Украшение; Радуйся, Надеждо нашего Воскресения; Радуйся, Заступнице Усердная, избави нас от всякого зла и сотвори чудо спасения.
Кондак 13
О, Всепетая Мати, рождшая всех святых святейшее Слово, призри ныне на Царство Твое земное и умоли Господа Вседержителя, да не внидет в суд с нами, но да подаст нам грехов оставление, от ига бесовскаго свобождение и Святой Руси Воскресение, вопиющим Богу верою: Аллилуиа. Аллилуиа. Аллилуиа.
(Этот кондак читается трижды, затем икос 1 и кондак 1)
Молитва Пресвятой Богородице перед Ея иконой, именуемой «Ченстоховская»
О Всемилостивая Госпоже, Царице Богородице, от всех родов избранная и всеми роды небесными и земными ублажаемая! Воззри милостивно на предстоящия пред святою иконою Твоею люди сия, усердно молящиеся Тебе и сотвори предстательством Твоим и заступлением у Сына Твоего и Бога нашего, да никтоже отыдет от места сего упования своего тощ и посрамлен в надежде своей; но да приимет кийждо от Тебе вся по благому изволению сердца своего, по нужди и потребе своей, во спасение души и во здравие телу. Моли, Милосердая Владычице, пренебеснаго Бога, да присно церковь свою святую соблюдет, вышним своим благословением архиереев наших православных укрепит, миром оградит и святей своей церкви целых, здравых, честных, долгодействуюших и право правящих слово своея истины дарует, от всех же видимых и невидимых врагов со всеми православными христианы милостивно избавит и во Православии и твердей вере до конца веков неотступно и неизменно сохранит. Призирай благосердием, Всепетая, и призрением милостиваго Твоего заступления на все царство наше Всероссийское, царствующия грады наша, град сей и святой храм сей, и излей на ня богатыя Твоя милости, Ты бо еси всесильная Помощница и Заступница всех нас. Приклонися к молитвам и всех раб Твоих, притекающих зде ко святей иконе Твоей сей, услыши воздыхания и гласы, ими же раби Твои молятся во святем храме сем. Аще же и иноверный, и иноплеменник, идя и проходя зде, помолится, услыши, чадолюбивая Госпоже, и сего человеколюбие и милостивно соделай, яже к помощи ему и ко спасению. Ожесточенныя же и разсеянныя сердцы своими во странах наших на путь истины настави. Отпадшия от благочестивыя веры обрати и паки сопричти святей Твоей Православней кафолической церкви. В семействах людей всех и во братии нашей мир огради и соблюди, в юных братство и смиренномудрие утверди, старость поддержи, отрочество настави, мужество умудри, сирыя и вдовицы заступи, утесненныя и в скорбех сущия утеши и охрани, младенцы воспитай, болящия уврачуй, плененныя свободи, ограждая ны выну от всякаго зла благостию Твоею и утеши милостивным Твоим посещением и всех благодеющих нам. Даруй же, Благая, земли плодоносие, воздуху благорастворение и вся, яже на пользу нашу, дары благовременныя и благопотребныя, всемощным своим предстательством пред Всесвятою Живоначальною Троицею, купно со святыми избранными угодниками Ея Кириллом и Мефодием. Прежде отшедшия отцы и матери, братия и сестры наша, и вся от лет древних припадавшия ко святей иконе Твоей сей упокой в селениях святых, в месте светле, в месте злачне, в месте покойне, идеже несть печаль и воздыхание. Егда же приспеет и наше от жития сего отшествие и к вечной жизни преселение, предстани нам, Преблагословенная Дево, и даруй христианскую кончину живота нашего безболезненну, непостыдну, мирну и Святых Тайн причастну, да и в будущем веце сподобимся вси, купно со всеми святыми, безконечныя блаженныя жизни во царствии возлюбленнаго Сына Твоего, Господа и Спаса нашего Иисуса Христа, Ему же подобает всякая слава, честь и поклонение во веки веков. Аминь.
|
